1Ki 19 | ZomZIV | STEP | Tu-in Ahab in Jezebel kiangah Elijah hihna khempeuh le kamsangte khempeuh a thahzia a gen hi.

1 Kings 19

Horeb ah Elijah Tai

1 Tu-in Ahab in Jezebel kiangah Elijah hihna khempeuh le kamsangte khempeuh a thahzia a gen hi. 2 Tua ciangin Jezebel in Elijah kiangah, “Zing ciang tu bang hunin amaute khat bangin nang kong bawl kei tak leh tua sanga nasiazaw in pasiante in kei hong bawl ta hen,” a ci dingin thupuak a sawl hi.

3 Elijah lau ^{▼▼19.3 Ahikeh Elijah in mu a}-a a nuntak nadingin a tai hi. Judah a Beersheba a tun ciangin tua lai-ah a nasempa nusia-a, 4 amah guak sehnel-gam ah ni khat lam a pai lai hi. Amah poding kung phung khat tunga, a nuai-ah tu-in a sih nading thu a ngen hi. Amah in, “Kicing ta hi, TOPA aw, ka nuntakna la in; ka pu ka pate sangin ka hoih zaw kei hi,” a ci hi. 5 Tua ciangin amah sing nuai-ah lumin a ihmu hi. ^b

Tua khit phetin vansawltak khat in amah lawnga, “Tho inla ne in,” a ci hi. 6 A kimkot a et leh a lukhung gei-ah meiholsa tunga ki-em anlum moh le haitung khatah tui a na om hi. Amah in ne-in dawna a lumsuk kik hi. ^c

7 TOPA vansawltak a nihveina pai kik a, amah lawng in, “Na pai nading gamla lua hi, tho inla ne in,” a ci hi. 8 Tua ciangin amah tho-a, ne-in a dawn hi. An in a tha khauhsak a Pasian mual Horeb a tun matengin sun sawmli le zan sawmli a pai hi. 9 Tua lai-a suanghawm sungah amah pai-in zanin a giak hi. ^d

Elijah Tungah TOPA Kilang

Tuateh Elijah tungah TOPA thu tunga: “Elijah aw, hih lai-ah bang hih na hi hiam?” a ci hi.

10 Amah in, “TOPA, Thahatpen Pasian adingin ka aam mahmah hi. Israel-te in thukhun nial uh a, na biakna-taute phelkhia mangin na kamsangte namsau-in a that uh hi. Kei kia bek a omlai sun ka hi-a, tu-in kei zong thah hong sawm uh hi,” ci-in a dawng hi. ^e

11 TOPA in, “Paikhia in, TOPA omna mual TOPA in nawk ding ahi manin tua tungah ding in,” a ci hi. ^f

Tua ciangin a lian a thakhauh mahmah huihpi in mualte semkham in, TOPA mai-a suangtumte pilhzansak a, ahi hangin huih lakah TOPA a om kei hi. Huih nun khit ciangin zin linga, ahi hangin zinling ah TOPA a om kei hi. 12 Zinlin khit ciangin mei kuanga, ahi hangin meikuang sung ah TOPA a om kei hi. Meikuang khit ciangin awneema a huau khiankhian khat a om hi. 13 Elijah in tua a zak ciangin a puantualpi in a mai khuh a paikhia-in suanghawm gongah a ding hi. ^g

Tua ciangin aw khat in, “Elijah aw, hih lai-ah bang hih na hi hiam?” a ci hi.

14 Amah in, “TOPA, Thahatpen Pasian adingin ka aam lua mahmah hi. Israel-te in na thukhunte nial uh a, na biakna-taute phelkhia mangin na kamsangte namsau in that uh a, tu-in kei zong thah hong sawm uh hi,” ci-in a dawng hi. ^h

15 TOPA in, “Nong paina lampi ah ciah kik inla Damascus Sehnel-gamah pai in. Tua lai-ah na tun ciangin Aram kumpi dingin Hazael sathau nilh in. 16 Israel uk dingin Nimshi tapa Jehu zong sathau nilh inla nang za laih a kamsang dingin Abel Meholah pana Shaphat tapa Elisha sathau nilh in. 17 Hazael’ namsau pana suaktate Jehu in that dinga, Jehu namsau pana suaktate Elisha in a that ding hi. 18 Tua hi napi Baal mai-ah a khukdin ngei lo, a muk uh tawh amah a tawp ngei lo - Israel sungah tul sagih ka sit lai hi,” a ci hi.

Elisha Sapna

19 Tua ciangin tua lai panin Elijah paikhia-a, Shaphat tapa Elisha a mu hi. Amah in bawngtal kap sawm le nih tawh lo a khawh laitak hi-a, amah in a kap sawm le nihna a hawl laitak ahi hi. Ama kiangah Elijah paito-a a puantualpi lawnin amah a khuh hi. 20 Tua ciangin Elisha in a bawngtalte nusia-in Elijah a nungdelh hi. Amah in, “Ka nu le ka pa mangpha khakin hong namsak phot in, tua khit ciangin nang kong zui ding hi,” a ci hi. ⁱ

Elijah in, “Pai kik in, nang bang hong cih ka hi hiam?” ci-in a dawng hi.

21 Tua ciangin Elisha in amah nusia in a pai kik hi. Ama zat bawngtalte la-in a go hi. Amah in sa huan nadingin a lo khawhna vante cih a, mite pia-in, amaute in a ne uh hi. Tua ciangin Elijah zui dingin kuankhia-a a nasem a suak hi.